خذ مني النصيحه

[صادق بس مين يصدقني]

خذ مني نصيحه لا تصدق كل ما ينقال
يجرك للنميمه لين يطرحك بحبايلها

يجيلك ناقل النمات بهروج تغث البال
سواليف في قفاك وحظك اطيب يوم تجهلها

يبرر بالحميه والصداقه شينة الافعال
يجمل صورته بعلومه اللي ما تجملها

ولو كانت حميه فيك رد المخطيه في الحال
ولا كان استمعها في قفاك وجاك شايلها

ترى من جاب لك ودى وهذي عادة النقال
يحاول يقتنص من فمك كلمه لجل ينقلها

ومثل ما قال عندك راح عنك وعند غيرك قال
وزود عشر فوق الكلمه اللي كنت قايلها

تجنب مجلسه لاتجلس الا مع كريم خصال
تحمل ميلته وان ملت ميلتك يتحملها

ولا تصبر على الجار الردي لو هي ثلاث ليال
تضرك جيرته لو كان بيبانك تقفلها

وبيع الدار بأول سومة تعرض على الدلال
ورزقك عند رب كاتب اللقمه وكافلها

ليا منك عرفت تميز الطيب من البطال
وفادتك التجارب فالحياة وفي مسائلها

كشفت الفرق ما بين الصحيح وحيلة المحتال
وتعلمت الفراسه في الوجوه اللي تقابلها

بعد هذا ترى مالك غنى عن صحبة العقال
يدلونك برأي ينقض الدعوه وياسلها

يقولون الرجال اللي سوالفهم حكم وامثال
ليا من ضاعت الحيله يدل القوم عاقلها

نصيحة واحد جرب وشاف من الزمان اهوال
يقدم لك خلاصة هجرة جرب هوايلها

http://www.alhayrh.com/galry/albums/userpics/normal_lan2.jpg